கொரோனா வைரஸ் தொற்றுக்கு எதிராக நாடு முழுவதும் பல்வேறு தடுப்பூசிகள் தற்போது பயன்படுத்தப்பட்டு வருகின்றன.குறிப்பாக இந்தியாவில் கோவிஷீல்டு, கோவேக்சின், ரஷியாவின் ஸ்புட்னிக்-வி, அமெரிக்காவின் மாடர்னா, ஜான்சன் அண்ட் ஜான்சன் ஆகிய 5 தடுப்பூசிகள் அவசர பயன்பாட்டு ஒப்புதலைப் பெற்றுள்ளன
இதனைத் தொடர்ந்து இந்தியாவில் அவசர பயன்பாட்டு ஒப்புதலைப்பெறுகிற 6-வது தடுப்பூசி ஜைகோவ்-டி ஆகும்.இந்த தடுப்பூசியை நாடு முழுவதும் 50-க்கும் மேற்பட்ட இடங்களில் தன்னார்வலர்களுக்கு செலுத்தி பரிசோதித்து உள்ளனர்.
ஜைடஸ் கேடிலா நிறுவனம் தடுப்பூசியின் அவசர பயன்பாட்டு அனுமதிக்காக கடந்த மாதம் 1-ந் தேதி, இந்திய தலைமை மருந்து கட்டுப்பாட்டு இயக்குனரகத்தில் விண்ணப்பித்தது.இந்த தடுப்பூசியை 12 வயது மற்றும் அதற்கு மேற்பட்ட குழந்தைகள் மற்றும் பெரியவர்கள் உள்பட அனைத்து மனிதர்களுக்கும் செலுத்தலாம் என்பது குறிப்பிடத்தக்கது.
ஜைகோவ்-டி தடுப்பூசியின் சிறப்பு அம்சங்கள்:
- இதை ஊசி மூலம் செலுத்த வேண்டியதில்லை. இதை ‘இன்ஜெக்டர்’ மூலம் செலுத்தவேண்டும். இதனால் பெரிய அளவில் பக்க விளைவுகள் நேராது.
- இது 3 ‘டோஸ்’ தடுப்பூசி ஆகும்.
- இது கொரோனா வைரசுக்கு எதிரான உலகின் முதலாவது ‘டி.என்.ஏ.’ தடுப்பூசி ஆகும்.
- இந்தியாவில் 12 முதல் 18 வயதினருக்கான முதல் தடுப்பூசி அவசர பயன்பாட்டுக்கு வருவது குறிப்பிடத்தக்கது.
