‘நீட்’ எம்.டி.எஸ். கவுன்சிலிங் ஆனது ஆகஸ்டு 20 முதல் அக்டோபர் 10 வரை நடைபெறும் என்று சுப்ரீம் கோர்ட்டில் மத்திய அரசு தெரிவித்துள்ளது.
கடந்த ஆண்டு டிசம்பர் மாதம் 16-ந் தேதி முதுநிலை பல் மருத்துவ படிப்புக்கான (எம்.டி.எஸ்.) ‘நீட்’ தேர்வு நடத்தப்பட்டது. தேர்வு முடிவுகள் கடந்த டிசம்பர் 31-ந் தேதி வெளியாகி பல மாதங்கள் ஆகியும் இதுவரை கவுன்சிலிங் நடத்தப்படாமல் தாமதம் ஏற்பட்டுள்ளது.
இதனால் பல் மருத்துவ மாணவர்களின் நேரம்மும் ,எதிர்காலமும் பாதிக்கப்பட்டுள்ளது. எந்த ஒரு தேதியும் அறிவிக்கப்படாமல் கிடப்பில் உள்ள நிலையில் என்.டி.எஸ். கவுன்சிலிங்கை 3 வாரங்களுக்கு நடத்தக் கோரி சுப்ரீம் கோர்ட்டில் மனு தாக்கல் செய்யப்பட்டது. இந்த மனுவை நீதிபதி டி.ஒய்.சந்திரசூட் தலைமையிலான அமர்வு விசாரித்தது. ‘நீட்’ எம்.டி.எஸ். கவுன்சிலிங் தேதியை ஒரு வாரத்துக்குள் அறிவிக்க மத்திய அரசுக்கு உத்தரவிட்டது.
இந்த நிலையில், ஆகஸ்டு 20-ந் தேதி முதல் அக்டோபர் 10-ந் தேதி வரை ‘நீட்’ எம்.டி.எஸ். கவுன்சிலிங் நடைபெறும் என மத்திய அரசு சார்பில் சுப்ரீம் கோர்ட்டில் தெரிவிக்கப்பட்டுள்ளது.
